Mga tapat sa Diyos, subukan sa 2016

INSPIRASYON SA BUHAY: “… Ang poot ng Diyos ay nahahayag mula sa langit laban sa mga palalo at masasama na hindi kumikilala sa katotohanan, dahil na rin sa kanilang kasamaan, sapagkat ang lahat ng dapat malaman ukol sa Diyos ay maliwanag sa kanila, sapagkat ipinakita na ito ng Diyos…” (Roma 1:18, Bibliya).

-ooo-

MGA LIDER NA TAPAT SA DIYOS, DAPAT SUBUKAN SA 2016: Gusto natin ng mga lider na mahusay sa 2016? Basahin po natin ito: May mga nakabasa ng ating kolum ukol sa ating mga paalala sa mga botante na ang dapat lamang nilang iboto ay ang mga kandidatong may takot at pagmamahal sa Diyos sa kanilang mga puso at pinananahanan ng Espiritu ng Diyos. Sabi nila, masyado daw akong relihiyoso, at ang relihiyon ay di daw sagot sa mga suliranin ng ating bansa.

Una po, hindi po ako relihiyoso. Hindi ko sinabi na ang mga botanteng Pilipino ay dapat bumoto ayon sa dikta ng kanilang relihiyon. At di ko din po sinabi na ang relihiyon ang siyang solusyon sa mga suliranin sa bansa. Ang sinasabi ko lang po, kailangang mapuno ng Espiritu ng Diyos ang tao, at matuto silang sumunod sa Kanyang mga utos upang tanging ang mga maka-Diyos lamang ang mahahalal sa ngayon.

Tunay nga, maraming mga tao na wala talagang diyos---o di kaya ay nananampalataya lamang sa kanilang mga nguso at hindi sa kanilang mga puso---ang nagawang mahalal na sa mga posisyon,. Dahil dito, kailangang sumubok tayo ng mga bagong lider, lalo na yung mga sinserong nananampalataya sa Diyos, anuman ang kanilang relihiyon.

-ooo-

RELIHIYON AT PULITIKA, KAKAIBANG PANANAW: Magkaganunman, mayroong isang mambabasa tayo na magaganda din naman ang mga ideya, bagamat kontra ang mga ito sa aking sariling mga paniniwala. Ang pangalan niya ay Trevor Llewellyn Evans, mula sa Facebook group na “The 1987 Constitution of the Republic of the Philippines”. Naririto ang kanyang mga reaksiyon sa ating kolum: “Sa alinmang pagtutuos ng kasaysayan, maipapakitang nakakagawa ang relihiyon ng masasamang tao, kasabay ng nakakagawa din ito ng mabubuting tao.

“Dahil sa relihiyon, maraming mga dakilang pagtulong ang naganap, at nakalikha ng magagandang musika, singing at arkitektura, at ganundin ang hindi mabilang na halimbawa ng kabutihan ng tao. Pero, naging inspirasyon din ang relihiyon ng mga kakila-kilabot na mga digmaan, brutal na paninikil, mapaniil na pamahalaang pinamunuan ng mga nasa simbahan, panatikong kampanya upang maghasik ng takot, at di mabilang na insidente ng diskriminasyon, at pagkagalit at kakitiran ng isip.

“Nangangamba kang ang mga taong di-maka-diyos ay hindi maayos, pero hindi ito masusulusyunan ng relihiyon. Kung tutuusin, mas matindi ang problema kung ang nahalal na opisyal ay may paniniwala sa Diyos at may pananawa na ang kanyang mga naisin ay hindi lamang para sa kanyang pansariling kapakanan kundi kalooban ng Diyos mismo. Ang mga walang diyos, o ang mga di naniniwala sa Diyos, ay walang pagpapanggap na ang kanilang mga opinyon ay batay sa sinabi ng Diyos.

-ooo-

“MAKATAONG LIDER”, MAS MAHUSAY KAY SA MGA MAKA-DIYOS NA LIDER? “Sa kabilang dako, ang isang taong tunay na naniniwala na sila ay kumikilos batay sa kautusan ng isang tagapaglikha ay hindi kumikilala ng katibayan, o pag-uusap, at pakikipag-kompromiso, gaya ng ipinapakita ng mga giyerang pang-relihiyon na patuloy na nag-aalab sa kabila ng paglipas ng libong taon.

“Sa ganang akin, naniniwala akong ang mundo ay mas mapapaglingkuran ng mahusay ng mga `makataong lider’. Ang pagiging `makatao’ ay kinikilala bilang batayan ng demokrasya, at kumukumpirma na ang sangkatauhan ay may karapatan at tungkuling sila mismo anguukit ng kanilang mga buhay. Nagsusulong ito ng pagtatatag ng isang makataong lipunan batay sa mga makatao at maka-kalikasang konsiderasyon, ayon sa makakayanan ng tao mismo.

“Hindi ito batay sa pagkilos ng isang diyos, at hindi nito tinatanggap ang mga pananaw na nakabatay sa isang manlilikhang diyos. Angpagiging makatao ay isang ideolohiya na nagsusulong ng talakayan, mahusay na pagkilos at katarungan, na tumatanggi sa mga ideang pang-relihiyon…”

-ooo-

MAKINIG: “Ang Tanging Daan”, isang Bible study at prayer session sa radyo, ay mapapakinggan Lunes hanggang Biyernes, alas 6:30 hanggang alas 7 ng gabi, sa DWAD 1098 kHz sa AM band. Sa mga replays: www.facebook.com/angtangingdaan atwww.facebook.com/ANDKNK at hanapin “Ang Tanging Daan” daily broadcast. Telepono: 0922 833 43 96, 0918 574 0193, 0917 984 24 68. Email: batasmauricio@yahoo.com.

-30-